Հայաստանի Հանրապետությունում ապրիլին օդի ջերմաստիճանը, նախնական տվյալներով, կանխատեսվում է, որ կլինի կլիմայական նորմայից մեյից երկու աստիճանով բարձր, տեղումների քանակը կլինի նորմային մոտ ու մի փոքր պակաս: «Արմենպրես»-ի հաղորդմամբ՝
այս մասին լրագրողներին ասաց ՀՀ շրջակա միջավայրի նախարարության «Հիդրոօդերևութաբանության ու մոնիթորինգի կենտրոն»-ի տնօրենի տեղակալ Գագիկ Սուրենյանը: Անդրադառնալով վերջին շաբաթում մեր հանրապետությունում դիտված
եղանակակլիմայական պայմաններին՝ մասնագետը հայտնեց, որ չնայած դրանք կանխատեսված էին, սակայն, այնուամենայնիվ, դրանք մասնագետներին անակնկալի են բերել: «Այն, ինչ մենք ունեցանք, աննախադեպ էր մեր ամբողջ օդերևութաբանական պատմության ընթացքում: Տարվա այս ժամանակահատվածում՝
մարտի կեսերին, հանրապետության տարածքում ու, հատկապես, Սյունիքի ու Տավուշի հովտային գոտիներում, որոնք համարվում են մեր հանրապետության ամենատաք հատվածները, մենք 2 օրում ունեցանք բնակավայրեր, որտեղ ձյան ծածկը հասավ մինչև 1 մետրի, իսկ
հանրապետության լեռնային գոտիներում դիտված աննախադեպ բուքը առանձին շրջաններում առաջացրեց 6 մետրի հասնող ձյան կուտակումներ»,- նշեց Գագիկ Սուրենյանը: Նա շեշտեց, որ մարտի 3-րդ տասնօրյակում նման եղանակակլիմայական պայմանները աննախադեպ էին ողջ օդերևութաբանական պատմության մեջ: Ու հավելեց, որ առատ ձյան առկայությունը դրական մեծ ազդեցություն կթողնի գյուղատնտեսության, ջրամբարների ու գետերում կայուն հոսքի ձևավորման վրա: Մասնագետը մանրամասնեց,
որ եղանակային այսպիսի իրավիճակը հիմնականում պայմանավորված էր Արևմտյան Սիբիրից եկող արկտիկական ցուրտ օդային հոսանքների և, մյուս կողմից, Միջերկրական ծովից եկող արևադարձային խոնավ տաք օդային հոսանքների բախմամբ: Դրանք բախվել են հենց մեր հանրապետության տարածքում և առաջացրել հզոր մթնոլորտային ճակատ ,ինչի հետևանքով դիտվեցին նման ինտենսիվության առատ ձյան տեղումներ: