Եվրախորհրդի Խորհրդարանական վեհաժողովի դիտորդները մտահոգություն են արտահայտել Հայաստանում ինստիտուտների միջեւ լարվածության բարձր մակարդակի վերաբերյալ: Այդ մասին ասվում է Հայաստանում ԵԽԽՎ մոնիթորինգի հանձնաժողովի համազեկուցողների տարածած հայտարարության մեջ, որն ամբողջությամբ տեղադրված է ԵԽԽՎ կայքում:
«Մեզ շատ անհանգստացնում է Հայաստանում երկու պետական ինստիտուտների՝ վարչապետի աշխատակազմի ու Սահմանադրական դատարանի նախագահի միջեւ լարվածության բարձր մակարդակը»,-նշում են Հայաստանում մոնիթորինգի հարցով ԵԽԽՎ համազեկուցողներ Անդրեյ Շիրչելն ու Քիմո Քիլյունենը:
Ըստ հայտարարության՝ վերահսկողությունն եւ հակակշիռներն անհրաժեշտ են ցանկացած ժողովրդավարական համակարգում:
«Դա ենթադրում է, որ բոլոր ինստիտուցիոնալ լիազորությունները պետք է գործեն օրենքի գերակայության պայմաններում»,-նշում են համազեկուցողները՝ հավելելով, որ եթե նրանք չկարողանան համագործակցել այդ սկզբունքներով, վնաս կհասցնեն մեկը մյուսին:
Համազեկուցողների խոսքով՝ այդ լարվածությունը կարող է վնաս պատճառել դատական համակարգին ընդհանուր առմամբ, որի վստահությունն արդեն իսկ ցածր մակարդակում է:
«Առայժմ կառավարություննեւ խորհրդարանն իրավիճակը կարգավորելու համար պահպանել են իրավական ընթացակարգերը: Դեռ ավելին, իշխանությունները դիմել են Վենետիկյան հանձնաժողովին Սահմանադրական դատարանի դատավորների՝ վաղաժամ կենսաթոշակի անցնելեւ մեխանիզմի մասին կարծիք ստանալու համար:
Եվրոպական չափանիշներին համապատասխան՝ Վենետիկյան հանձնաժողովն ընդգծել է, որ ժամանակից շուտ թոշակի անցնելը պետք է կրի խիստ կամավորական բնույթ ու այդ սկզբունքն անհրաժեշտ է պահպանել»,-հավելել են նրանք Իրենց խոսքով՝ որպես համազեկուցողներ՝ նրանք համակ ուշադրությամբ կհետեւեն, որ Հայաստանի իշխանությունը շարունակի գործել այդ կերպով, եթե անգամ այդ մեխանիզմի նպատակը, որը կայանում է 2015 թվականի սահմանադրական փոփոխությունները պահպանելու մեջ, ճշմարիտ է:
«Մենք արդեն ընդգծել ենք անհրաժեշտությունը, որ քաղաքական գործիչները պետք է զերծ մնան գործողություններից ու հայտարարություններից, որոնք կարող են ընկալվել որպես դատական համակարգի վրա ճնշման գործադրում: Բացի այդ, մենք կոչ ենք անում բոլոր կողմերին նվազեցնել լարվածությունը»,-նշել են համազեկուցողները:
Ինչպես նշված է հայտարարության մեջ, այդ լարվածությունը չպետք է քողարկի Հայաստանում ինչպես նախապատրաստական փուլում գտնվող, այնպես էլ բազմաթիվ ոլորտներում մեկնարկած բարեփոխումների անհրաժեշտությունը, որոնք գտնվում են Եվրախորհրդի հետաքրքրության շրջանակում։